紅軍出齊架生屠「城」

猪拉多纳

史杜列治回歸鋒力勁
闊別三個月，小妹再次同《太陽報》嘅讀者見面啦！相信各位英超迷哥迷姐同小妹一樣，等英超開鑼等到頸都長埋，今日新季第一擊，決定支持喺熱身賽表現出色嘅利物浦，可以喺主場擁躉面前輕取史篤城。

上季衝擊歐洲賽席位失敗嘅利物浦，喺季前熱身賽嘅表得氹到支持者鬼死咁開心，7場錄得6勝1負、攻入14球僅失2球嘅靚績，確係畀到「紅軍迷」信心。雖然利記今夏一直畀蘇亞雷斯嘅轉會風波困擾住，但慶幸6月尾加盟嘅西班牙鋒將伊亞高艾斯巴斯表現搶鏡，喺熱身賽中貢獻咗4個入球、3個助攻，表現博得領隊羅渣士盛讚。

史篤城曉士帶乜都唔掂
咪忘記史杜列治今晚會強勢復出擔正，睇佢前排後備落場對些路迪同紐卡素兩仗嘅表現，就知呢位射手已經歸位，返晒嚟啦！今晚由佢喺鋒線孭重飛，配合「古天樂」菲臘比古天奴，唔使擔心利物浦會冇波入。

係，從兩軍近年對賽往績睇嚟，史篤城絕對稱得上係利物浦嘅剋星，自從2011年2月開始，紅軍未試過喺英超贏史篤城，不過今時唔同往日，由羅渣士帶領嘅紅軍又年輕又有活力，一眾新星喺老大哥謝拉特帶領下愈戰愈勇，威番次都唔奇吖！

最重要一點，就係以前嘅史篤城其實係一支好爛打嘅球隊，可惜領隊之位由有料嘅佩尼斯，換上踢波一流、教波九流嘅曉士，呢位老哥帶曼城同昆士柏都唔掂，更何況質素同財力差一大截嘅史篤城？今晚想捧「史軍」嘅朋友都係睇定啲，係都等佢哋返主場先算啦！