黑貓入得失得2粒啱數

猪拉多纳

今晚英超開咧夜有銳意大展拳腳嘅新特蘭主場迎戰富咸，「黑貓」今季由祖雲達斯買入嘅意大利射手基亞卓尼利表現對辦，配合埋艾迪杜里等高質攻擊手唔怕冇波入，不過富咸開咧戰甚少輸波，防線硬淨唔會失太多球，總入球必捧2球。（now622台周六晚10:00直播）

論名氣，今季加盟新特蘭嘅前鋒當中，肯定以基亞卓尼利最高，不過美國射手艾迪杜里日前亦都喺國際熱身賽中連入3粒，助「花旗兵」擊敗波斯尼亞，難怪迪肯尼奧都話佢會喺英超打出名堂，要射穿連續5場熱身賽都失波嘅富咸，照計冇難度。

不過睇番往績，富咸喺開咧戰甚少輸波，過去4季就錄得2勝2和，加上佢哋今季增兵主要針對後防，包括前畢爾包中堅阿武列比達、科隆右閘沙斯查列達及羅馬門將史基倫堡，相信唔會失太多球，至於前線除咗原有嘅貝碧托夫外，亦都正式買斷泰拉拔，面對攻強守弱嘅「黑貓」都有力取得進帳，預計兩軍各入一球下，總入球2粒就啱數。