阿仙奴維拉鬥入波

猪拉多纳

阿仙奴今晚喺英超開咧戰主場對阿士東維拉，好有機會「大」開殺戒！原因係兵工廠中後場唔齊腳，逼住以守代攻，加上「熱身賽狂人」基奧特突然弗到漏，領隊雲格今季結束後約滿，需要省靚招牌避免衰收尾，殺氣盛捧1.48倍入球大！（now620、621台及廣東體育周六晚10:00直播）

傷兵問題同阿仙奴似乎永遠分唔開，未開咧佢哋已經有左閘蒙利爾同隊長華美倫唔踢得，連中場最肯守嘅阿迪達都最少要抖6周，咁嘅情況，就算翼鋒禾確特喺國際賽受傷，都惟有喪攻搶分氹球迷開心，唔好忘記，地位不穩嘅射手基奧特喺7場季前熱身賽勁入8球呀！

雲格爭成績續約
雲格喺賽前記招都話，阿仙奴今季就算唔買人都唔會有啲乜嘢危機，擺到明對呢位法國射手投以信心一票，相信基奧特點都會打爭氣波，今晚大把機會騷哥利。仲有呀，今季係兵工廠領隊雲格合約最後1年，聽佢口氣，應該係想續約教到退休為止，如果係咁，新球季主場首戰點衰得呀？梗係要攻啦！

另一方面，維拉有隊長李察鄧尼離隊，佢哋上季失球數字高企，依家防線要重新適應，作客絕對唔似頂得住兵工廠炮火，不過佢哋除咗有射手賓迪基留隊，仲買咗個洛斯查蘭特前鋒歷卡斯希倫尼斯幫手，證明領隊林拔肯諗計減輕賓迪基嘅負擔，玩入球大啱數。