阿積士飛常值捧

猪拉多纳

主場績靚讓波未驚過
荷甲今晚爆發傳統打吡戰，阿積士主場鬥飛燕諾，兩軍上周同在以寡敵眾之下反勝為敗全失3分，比較之下，飛燕諾今仗有兩名防線主力停賽，加上近年作客阿積士輸多贏少，波童撐阿積士可以打場翻身仗，捧「讓球主勝」。

（now 670及672周日晚6時30分直播）

雖然燕豪芬先係阿積士近年主要爭標對手，不過喺唔少荷蘭人心目中，阿積士對飛燕諾先係每季荷甲最重要嘅戲碼，地位等同西甲嘅國家打吡皇馬對巴塞，事關兩支球隊分別來自國內兩個最大城市阿姆斯特丹同鹿特丹，歷史因素令到兩軍每次碰頭都踢得格外肉緊，戰意特別高昂。

飛燕諾兩大守將停賽
阿積士上周作客阿爾克馬爾於兩度領先下，因有後衞連積領紅牌兼輸12碼，最終以2比3落敗，無巧不成話，飛燕諾面對川迪同樣先開紀錄，後來因佐迪雲迪倫及迪維積先後被逐，結果大敗1比4，最慘兩人同屬後防主力，今輪齊齊坐波監料對防線造成影響。相比之下，阿積士一向攻強於守，加上主場出擊唔會刻意死守，缺少停賽嘅連積影響自然較細。飛燕諾近年作客阿積士都冇運行，對上6次錄得1和5負嘅劣績，而且輸波全部都淨輸兩球或以上，今場不妨進取啲捧「讓球主勝」。