熱刺新寵玩轉水晶宮

猪拉多纳

蘇爾達杜孭飛火力勁
今季英超冠軍普遍認為係車路士、曼聯同曼城之爭，至於關鍵嘅第4位，就以熱刺、利物浦同阿仙奴最大機會，成個暑假飽受加里夫巴利轉會問題困擾嘅熱刺，今晚就會作客升班球隊水晶宮，小妹認為熱刺已經買咗一大批好球員，就算放走加里夫巴利都唔成問題，今場好大機會旗開得勝！

4件新兵都係球壇搶手貨
雖然上季英超入咗21粒兼成為雙料足球先生嘅加里夫巴利死要過皇家馬德里，保亞斯亦證實呢位威爾斯快翼今晚唔會上陣，中場丹普西、侯度史東及後衞加拿斯亦都已經離隊，正正好多人都擔心熱刺可唔可以延續近季強勢之際，保亞斯就先後入咗幾件「靚貨」，包括華倫西亞射手蘇爾達杜、巴西國腳中場荷西保連奴、川迪指揮官查迪尼同啱啱來投嘅法甲新星伊天卡普爾，呢四位新兵早已成名，仲係今夏轉會市場搶手貨，質素比幾位離咗隊嘅球星仲要好！

當中小妹最寄予厚望嘅，當然係西班牙國腳蘇爾達杜啦！呢位「型佬射手」係西甲最多產嘅前鋒之一，上季上陣46場入咗30球，每次落場仲鬼死咁搏命，有佢拍住艾朗連儂同迪科爾，熱刺嘅火力認真唔講得笑！

水晶宮入波要靠40歲菲臘斯
另邊廂，水晶宮僅靠升班附加賽奪得最後一個英超席位，最大功臣肯定係韋費特沙夏，同埋上季有30個聯賽入球嘅格連梅利，可惜呢Pair箭頭一個已經回歸曼聯，一個就喺升班附加賽重傷，今仗未必披甲，齋靠新兵查馬克同年屆40歲嘅菲臘斯數胡，邊靠得住呀？

仲有一點，就係水晶宮將帥嚴重缺乏英超經驗，領隊荷路維只係帶過黑池踢頂級聯賽一季，隊長柏德列麥卡菲更加未踢過英超添！無論經驗、名氣同戰績，熱刺都佔盡優勢，撐1.65倍客W啦！