森本來投 千葉裝兇作「細」

猪拉多纳

呢個禮拜日本最大單嘅轉會新聞，唔使講就係森本貴幸（圖）回歸加盟日乙千葉市原，多咗件「和製朗拿度」係咪代表千葉今日作客松本山雅W硬呢？Sorry，似乎入球細穩陣過客勝嘞。（開賽時間：周日下午5:00）

外流意大利同中東前後7年，森本貴幸呢個前日本國腳嘅級數，一定夠踢日職有餘，但係佢點解要自貶身價，走去加盟日乙嘅千葉呢？理由好簡單，森本希望返日本「騷哥利」，博畀沙哲朗尼睇中，出年有得去世盃決賽周，所以佢揀咗踢正選機會比較大嘅日乙落腳，家陣排第3位、努力衝擊日職嘅千葉，無疑係個唔錯嘅選擇。

近3次鬥松本全開細
正路嚟講，以森本嘅級數對千葉幫助好大，但係佢呢兩年坐多過踢，狀態唔喺顛峰，而且本應拍住佢嘅愛華頓甘比斯又要停賽，少咗呢件千葉頭號射手掩護，森本一定成為松本嘅重點照顧對象，冇咁容易為所欲為。何況松本件中場喜山康平，就係森本早年响東京綠茵青年軍時代嘅雙箭頭拍檔，路數畀老友摸熟晒，未必惡得出樣。

睇埋往績，松本近年3鬥千葉只得1勝2負，唯一贏嗰場就係主場出師，證明呢隻門口狗响自己地頭有啲料到。更重要係雙方過去3戰都全部開細，1.65倍入球細點睇都保險過2.05倍客W。