曼城狂牛 撞冧爛尾「紐」

猪拉多纳

今晚上演英超首周壓軸大戰，由大事增兵嘅曼城主場迎戰紐卡素！「藍月亮」上季被曼聯喺積分榜拋離兼喺歐聯分組賽包艇，季前佢哋痛定思痛，換帥兼重用西班牙兵，務求以全新嘅「狂牛曼城」惡戰英超群雄，今晚第1擊，又點可以失威？「喜鵲」上季雖然幾乎降班，但都唔識死懶得買人，點同曼城抗衡吖，撐1.7倍「讓主」啦！（now620及621台、廣東體育周二凌晨3:00直播）

當人人都趁夏天轉會窗增兵嘅時候，英超偏偏有幾間老牌球會「坐定粒六」，除咗不斷「差啲簽到」嘅阿仙奴，紐卡素亦係「孤寒」嘅表表者！佢哋唯一嘅「收購」，就係買斷上季由昆士柏流浪借用嘅雷米，可惜呢位射手今晚有傷唔出得，即係話紐記嘅兵力同上季爭啲降班嗰陣完全冇分別，小妹真係唔信領隊柏杜可以扭轉乾坤喇！
紐卡素冇增兵友賽和格流

遠嘅唔講，淨係睇紐卡素季前熱身賽嘅表現，都已經叫捧場客反晒胃啦！佢哋衰到連踢緊蘇甲嘅格流都係僅和1:1、鬥葡超嘅費利拿同里奧艾維又贏唔到，就知班人有幾咁「爛」，實力幾咁有限啦！

對家曼城今夏繼續大手「買星」，當中更以西班牙國腳為主，重點收購西維爾孖寶捷西斯拿華斯同尼格度，配合原有嘅查維加西亞同大衞施華，成隊正選有4件「鬥牛國腳」，大家同聲同氣夾慣夾熟，默契夠晒保證啦！

除咗新兵，舊有嘅球員喺熱身賽亦有好表現，上季出場時間少但都榮膺球隊首席射手嘅迪斯高，咁多場波加埋入咗4球；耶耶托尼都Keep得住上季咁弗，咪忘記占士米拿、拿斯尼同新援費蘭甸奴等攻擊手都可以落場改變戰局，曼城要喺開咧戰炒「喜鵲」攞頭威，「Easy Job」啦！
信往績揸住入球大玩過關

紐卡素近年對曼城一直都冇運行，今晚再畀人炒嘅機會極高，不過值得留意嘅係「喜鵲」條防線雖然渣到暈，近5次對曼城至少淨輸2粒，但佢哋近5次作客「藍月亮」有4仗取得入球，兩軍今晚好可能又合演「大」騷，1.5倍入球大做過關膽就最啱喇！
藍月亮對賽例大勝

兩軍近13次對賽，曼城全部不敗，近7戰全勝，近5戰至少以2球之差贏波。

曼城近6次對紐卡素有5次開入球大。

紐卡素上季英超失球數字第4高，場均失1.79球。