撞正剋星美斯 馬體會無運行

猪拉多纳

韋拿倒戈畀巴塞捉晒路

西甲開咧戰重現夢3年代超級霸氣嘅巴塞隆拿，今晚喺西班牙超級盃首回合作客硬撼馬德里體育會，淨係一個美斯繼續孭飛，已經炒得起對手有餘。唔係講笑，美斯球員生涯入球無數，但原來攻入最多嘅大門正正係馬體會，有成20球之多，對住呢個私人出氣袋，巴塞要贏波自然話咁易，1.52倍客勝夠晒穩陣啦！（now632台周四清晨5:00直播）

巴塞喺開咧戰大勝利雲特7蛋，半場已經入咗6粒，換邊後收韁只入1球，如果全力搏殺，真係炒夠雙位數都有可能。「地上最強」能夠重現光芒，交出2入波同1助攻嘅美斯當然居功至偉，上仗佢踢咗70分鐘就退下火線，擺明留力今場。最緊要係佢對住馬體會咁有入波心得，加上依家成班波都咁Fit，就算作客都冇有怕啦！
馬天奴新戰術勁 施蒙尼投降

值得一讚嘅除咗美斯，其實仲有新帥馬天奴，《每日體育報》尋日分析巴塞創出史上最佳開咧戰賽果嘅背後原因，就認為要多得馬帥嘅新戰術。有睇過當晚場波都知，相比起上季多用兩閘落底，美斯係多咗返落去中場校炮，造就隊友有更多空位插上。而且球隊更多嘅前場緊迫，令對手難以組織攻勢，更多嘅長傳亦令一向踢小組進攻嘅佢哋戰術變化增加。事實上，包括法比加斯同阿歷斯山齊士等，喺馬天奴手下都有翻生迹象，呢個阿根廷名帥真係有料，難怪馬體會主帥施蒙尼尋日都發表投降宣言，承認巴塞同皇馬喺西甲根本超晒班。
「地上最強」對賽6連勝

講番人腳，上仗做後備嘅包括恩尼斯達同佐迪艾巴等，都會輪換擔正。至於當日踢咗25分鐘嘅尼馬，馬天奴叫大家唔好心急，好快就會見到佢同美斯有更多合作，但依家會畀佢慢慢適應先，睇怕今仗會先任後備，但「地上最強」實力夠殺有餘，挾住對賽6連勝出擊，「依絲W」啦！

馬體會呢邊，開咧戰贏西維爾3:1，前鋒迪亞高哥斯達梅開二度，新兵韋拿都有1球進帳。冇錯，呢對星級組合實力當然唔簡單，不過倒戈出戰嘅韋拿，踢法相信已經畀巴塞兵睇熟晒，單靠迪亞高哥斯達或會孤掌難鳴。仲有，馬體會防中堤亞高文迪斯之前受傷，季前賽冇踢足，狀態麻麻，今仗搵佢去守巴塞，小心搓死冇命賠呀！
對賽208場平均入3.4球

雙方近15次交手均開入球大。

馬體會連續3季聯賽主場均以1:2不敵巴塞。

連熱身賽計，巴塞近6戰均開半場入球大。

雙方於西超盃曾經交手10次，馬體會只係試過响1985年勝出。

今場係兩隊第209次較量，喺以前208場對碰，總共產生729個入球，平均每場入3.4球。
西超盃賽制

採主客兩回合制，現為決賽首回合。若兩回合打和，會計算作客入球優惠，未分勝負將於次回合法定時間後加時30分鐘，加時仍計算作客入球優惠，再和則互射12碼決勝。