車仔齊心再抄維拉

猪拉多纳

「寸王」回歸上下都Buy

莫連奴，給你一個溫馨藍色的家！「寸王」重返史丹福橋後重視「親情」，承諾要將車路士重新團結並組織「藍色家庭」，目前上至班主阿布，下至球員球迷，人人齊心為藍戰士，憑住呢股洶湧澎湃嘅「藍潮」，今晚車仔喺英超主場迎戰阿士東維拉，1.65倍「讓主」依絲執。 （now620及621台、廣東體育周四凌晨2:45直播）
維拉上季作客交手吞8蛋

莫帥日前受訪許下承諾，要將上季破裂嘅車路士重建成為「藍色家庭」，喺回歸英超頭炮主場鬥侯城，佢就獲得大批粉絲拉橫額支持，林柏特最近亦開聲為莫帥分憂，話重返爭標行列人人有責，咪淨係依賴領隊咁話。從車仔喺揭幕戰2:0輕取侯城所見，林柏特、泰利、施治組成嘅中後場骨幹，雖然比起莫帥首次執教嗰陣老咗9年，不過落到場仍然老而彌堅，「林伯」射入世界波更盡顯身價，值得莫帥繼續重用。

再講，車仔有呢班經驗戰將以老帶新，亦激活咗奧斯卡杜斯山度士、夏薩特呢啲後生仔，或者費托打箭頭效果麻麻，但後備席仲有盧卡古同丹巴巴亞靜候落場機會博表現，進攻完全唔成問題。

對手阿士東維拉開鑼戰作客砌低阿仙奴，雖然好多人覺得係爆冷，查實「兵工廠」呢場以殘陣應戰，領隊雲格擴軍進度停滯不前，亦搞到球員士氣低落、球迷不斷柴台，邊會踢到好波吖，所以小弟覺得維拉踢落咁標青，根本係阿仙奴喺度「幫手」。今晚對手換成強陣勇態嘅車路士，維拉防線核心尼敦巴卡腳踝受傷倦勤之餘，諗起上季作客史丹福橋狂吞8隻光蛋嘅慘痛經歷，班人隨時有心理陰影腳仔軟，想輸少粒都難。