借場狂攻奧沙辛拿 畢爾包做大騷

猪拉多纳

今晚上演兩場西甲，戲碼較強嘅係尾場畢爾包撲擊奧沙辛拿。「巴斯克雄獅」今場會借用皇蘇主場聖塞巴斯提安艾奴伊達球場出戰，自主帥華爾維迪回巢後，成隊波煥然一新，首輪已贏咗華拉度列，當然想乘勝追擊，事實上奧沙辛拿屬老弱殘兵，作客肯定被攻到氣咳，入球大咪走雞。

（周六凌晨4時開賽）

畢爾包新球場未搞掂，要借用死敵皇蘇主場頂住先，會方今季搵嚟前華倫西亞教頭華爾維迪領軍，由於此君以前也曾執教過畢爾包，因此佢明白球隊嘅問題所在，今夏簽入貝迪斯嘅好波之人比納特，中場有番位領軍人物，連帶令兩翼馬高蘇沙亞達及蒙尼恩都即時生晒，配合華帥嘅主攻戰術，火力全開時攻擊力唔講得笑。
有望過吓一哥癮

奧沙辛拿一向莫財，今季繼續冇錢增兵，甚至連主力前鋒安歷基蘇拿都賣埋畀今場對手畢爾包，依家仍要重用年屆37歲嘅老人家賓奴，前景堪虞。畢爾包喺開鑼戰贏咗華拉度列，由於今場放周六凌晨開波關係，今仗只要有分落袋，即可上榜首過吓一哥癮，因此「巴斯克雄獅」求勝心切一定狂攻，入波唔會少，大盤有買趁早。