海倫芬 阿積士「冰島內訌」「大」戰

猪拉多纳

今晚荷甲獨腳戲，海倫芬主場迎擊阿積士，雙方教頭雲巴士頓同法蘭迪保亞嘅荷蘭名宿對決固然吸引，但千祈咪錯過場上嘅「冰島內訌」，冰島雙箭艾費特芬保加臣與史基賀臣近期狀態弗爆，今場二人各為其主，精彩「大」戰蓄勢待發，中位數調至3.5球1.88倍入球大照捧可也。

（now670及672台周六凌晨2:00直播）
冰島雙箭勁入波

海倫芬喺荷甲開咧兩連勝後，上場雖然走樣慘負荷華高斯，好在對箭頭艾費特芬保加臣全無影響，3場夾埋入咗4球之外，醒神演出更吸引些路迪同奧格斯堡出價搶購，可惜由於價錢唔啱令交易拉倒。相信佢嚟緊都會趁轉會窗仲未閂，盡騷哥利向班「準買家」證明自己物超所值。況且海倫芬喺主場鍾意大踢性感足球，今季踢咗2場就有12球交收，今場唔使怕冇波入。

作客嘅阿積士有中場施安迪莊日前因氣胸問題，入院接受治療後證實抖6個星期，不過有基斯甸艾歷臣擔任指揮官角色，組織攻勢依然流暢。最重要係射手史基賀臣繼荷超盃入波後，上場鬥飛燕諾梅開二度，成功喺聯賽開齋之餘，協助球隊喺呢場傳統打吡反勝對手，令信心及士氣激增，今場繼續有域陀費斯查同保贊兩翼側擊，史基賀臣肯定大把入波「餐士」。