畢爾包「主W」手到「拿」來

猪拉多纳

今晚西甲有畢爾包主場鬥奧沙辛拿，雖然主隊上季表現走晒樣，但兩名「叛徒」查維馬天尼斯及洛蘭迪已離隊，再換上新帥華維迪後有望令球隊表現更穩定，就算場波要改去皇蘇個主場舉行，佢哋要贏奧沙辛拿都唔係難事，一於敲1.58倍主勝。

（開賽時間：周六凌晨4:00）
球場未掂 改用皇蘇主場

畢爾包個新聖馬美斯球場因為工程未搞掂，預計要到9月15日對切爾達先可以正式啟用，因此今場波佢哋要問最近嘅皇蘇借場開波。講番隊波，畢爾包依家同兩季前嗰隊歐霸盃決賽分子相比已經面目全非，但新人事新作風反而令佢哋搵到一線生機！前任教練「狂人」比爾沙太倚重查維馬天尼斯同洛蘭迪，結果兩位主力分別離隊及坐冷板後，球隊隨即陷入崩潰。

今季華維迪回歸掌帥雖然未令「雄獅」即刻回復兩季前嘅勇猛，但就令實力更見平衡，上季狀態一度低迷嘅蒙尼恩喺開咧戰已經開齋，加上成功由格蘭納達挖走中場主將米基爾列高，配合原有嘅射手阿度里斯同馬高蘇沙亞達，喺主場出擊絕對有力轟散奧沙辛拿防線。

奧沙辛拿一開咧就喺主場輸畀上季要齊齊護級嘅格蘭納達，佢哋唔止將主力射手安歷基蘇拿放咗畀今仗對手畢爾包，更大鑊嘅係正選右翼艾華路施祖度受咗傷唔出得，火力進一步打折扣，想入番粒都難。