祖記頭炮-1有信森

猪拉多纳

新一季意甲正式開打，衞冕球隊祖雲達斯頭炮作客森多利亞。森多利亞今季陣容單薄欠星味，就連最有前途新人莫路伊卡迪都畀國際米蘭撬走，巨高對呢班波就唔睇好，相信質素高一皮嘅祖雲達斯可輕勝對手，2.25倍「讓球客勝」可捧。

（周日凌晨2時45分開賽，馬會網上文字直播）
森多新會長冇心搞波

森多利亞正選陣容真係弱到冇朋友，除咗隊長柏林保較有名氣之外，其他球員都名不見經傳。其實自前會長列卡路加朗尼於今年初不幸離世後，唔少「森多」球迷都對球會前景極之擔憂，縱然加朗尼家族傳人伊度亞度仍然統領着球隊，但佢嘅影響力及資源投放都及唔上老父，伊度亞度根本冇心搞波。大膽講句，森多利亞正逐漸步入黑暗時代，要保住甲組席位唔容易。

祖雲達斯係意甲其中一支財政穩健嘅球隊，於轉會窗亦較森多利亞積極得多，今年夏天祖雲達斯就收購咗泰維斯以及奧邦拿，另一名前鋒洛蘭特則以自由身加盟。祖雲達斯為前場注入新血後，戰力比上季更加強勁，開鑼日作客亦毋損球隊爭勝機會，一於強捧祖記旗開得勝。