飛腳踢館打橫行

猪拉多纳

今日阿King搞搞新意思轉玩日乙，擂台躉大阪飛腳氣勢如虹，從德國回流日本嘅前鋒宇佐美貴史弗到震，拍住腳風超順嘅射手艾迪洛查，火力全開唔係人咁品，今日作客誓炒近況曳爆嘅ＦＣ橫濱，不妨直取2.28倍「讓球客勝」。

（周日下午5時開賽）

作為日職傳統勁旅，大阪飛腳今季降落乙組，猶如虎入羊群，在中場核心遠藤保仁帶動下，飛腳攻力冠絕乙組，其中從德甲賀芬咸回流嘅前鋒宇佐美貴史大踢爭氣波，上仗大炒鳥取飛翔七個一皮之役又省兩粒，頻頻入波信心返晒嚟，加上另一位連續五場有士哥嘅巴西箭頭艾迪洛查，球隊之前四場聯賽贏晒狂轟十四球，等閒球隊實在難攖其鋒。

相反ＦＣ橫濱近八聯賽僅得一勝，狀態嚴重下滑，兩名主力守將森下俊及裴相珍今仗因傷停缺陣，防線勢必大穿窿，飛腳大勝冇難度。
撐阿些斯奧開齋

至於荷乙禾寧丹主場對泰斯達，禾軍一向有前冇後、打死罷就，不過泰斯達非善男信女，兩隊交鋒一定多波入，大盤咪錯過。最後法甲阿些斯奧上仗賽和勁旅聖日耳門，演出有板有眼，證明「白頭佬」教頭拉雲拿利有料到，今輪主場迎戰心繫歐霸嘅尼斯，有力打開勝利之門，平手盤兼低水擺明有計。