馬體伯會夠「歷」再開半場W

猪拉多纳

主場惡霸最叻速戰速決

啱啱喺西超盃首回合踢出漂亮一仗嘅馬體會，今晚回師西甲主場迎戰華歷簡奴，以佢哋強勁嘅主場威力，要砌低今季前線大換血、火力大減嘅客軍根本話咁易。最緊要係馬體會班波擅長「速戰速決」，連上仗西超盃對巴塞都可以半場領先，既然齋W得1.25倍冇肉食，不如博瓣1.72倍半場主勝仲過癮！（now632台及廣東體育周一凌晨1:00直播）

馬體會實力高出華歷簡奴唔止一截，雖然今個夏天佢哋放走超級射手法卡奧，但由巴塞補入嘅韋拿絕對唔差得幾多，加埋巴西箭頭迪亞高哥斯達又係有料之人，要入波簡直「依絲執」啦！
華歷簡奴5成機會半場落後

再者，馬體會嘅主場威力絕對唔講得笑，上仗能夠踢和「地上最強」之外，上季初更曾喺聯賽造出13連勝佳績，當中竟然有10場半場就領先，全季亦有近6成比率開到半場主勝添！值得一提，「床單軍」今季仲喺華歷簡奴收購咗20歲新星巴迪斯達奧！雖然呢位森巴射手賽前話主帥施蒙尼冇問過佢拎前東家資料，但你信唔信先？

華歷簡奴呢邊，開咧戰作客大勝艾爾切「3蛋」，睇落幾巴閉，但咪忘記對手係新升班，根本唔多夠班，今鋪對住馬體會仲點會有運行！仲有，佢哋今夏先後放走首次席射手比迪同巴迪斯達奧，留低嘅荷西卡路士上輪聯賽又左膝重創要抖半年。雖則華歷簡奴啱啱由艾美利亞借用前巴塞小將科基，睇怕幫唔到幾多，以佢哋上季作客近一半賽事半場落後，今晚想頂耐啲都難。