史雲斯走樣 熱刺食住上

猪拉多纳

雲格撬牆腳 兩主力Hea踢

今夏轉會窗喺9月2號先關閉，唔少球會都盡最後努力增兵，其中史雲斯兩件主力米捷同艾殊利威廉斯，近排就成為阿仙奴嘅收購目標，搞到佢哋唔多專心，齋睇「天鵝」喺上輪英超有主場之利，都可以大敗畀今非昔比嘅曼聯1:4，今晚作客熱刺，小妹對佢哋冇晒信心，都係捧1.53倍主勝穩陣！

史雲斯喺季前熱身賽同歐霸盃附加賽表現得好好，但自從傳出阿仙奴領隊雲格想出手撬米捷同艾殊利威廉斯後，一開咧遇上曼聯就即刻露底，全場畀人撳住嚟砌之餘，條防線仲甩甩漏漏，除咗話艾殊利威廉斯心不在焉，就連守將捷高同門將禾姆，亦一樣犯錯，任紅魔前線孖寶尹佩斯同韋碧克予取予攜，諗番上季佢哋一鳴驚人，突然間走晒樣，真係覺得好鬼陰功。
史雲斯遇強即見底

防線唔掂，鋒線嘅表現亦唔好得去邊，上季連盃賽上陣43場攻入22球嘅米捷，對住曼聯成場波都無神無氣，反而後備入替嘅荷甲神射手韋菲特邦尼喺下半場先幫史雲斯破蛋，可見米捷真係有啲嘢咁喎。係，雖然「天鵝」喺上周中歐霸盃炒咗比杜路爾一鋪，不過呢支羅馬尼亞球隊實力根本唔可以作準，大家咪畀佢哋呃到呀！
蘇爾達杜開咧2戰都入波

另邊廂，熱刺啱啱都係喺歐霸盃大捷，仲叻到作客5:0炒起第比利斯戴拿模添，連埋上輪聯賽1:0贏水晶宮，新兵蘇爾達杜2戰都有入球，真係有料到o架。呢位射手之前受訪，講明自己今季嘅目標係至少入20球，小妹相信今晚呢位西班牙射手喺自己地頭，一定會表現得更加出色。最重要係熱刺近2季喺英超4鬥「白天鵝」，當中有3次贏波，優勢一面倒，今晚梗係再追主勝啦！