雙箭勁惡係時候發威

猪拉多纳

史特加追打「黑仔窮鬼」

開咧後同樣兩戰兩敗嘅奧格斯堡同史特加，今晚正面碰頭鬥快反彈，阿占就睇好作客嘅史特加至少唔使輸。始終呢支上季德國盃亞軍勁旅，開季要分心歐霸盃，但佢哋嘅整體表現其實唔差，只係把握力同運氣一般先落得咁嘅局面，論質素，史特加當然高過奧格斯堡啦，衰不過三，今晚史特加受讓，幾大都撐1.65倍「讓客」。（有線61、64、201及203、中央5台周日晚11:30直播）
奧堡2連敗 「救星」打埋柴

奧格斯堡上季僅僅護級成功，呢間財力相當有限嘅球會，早前以75萬歐元「重金禮聘」嘅阿根廷前鋒波巴迪拿，上星期後備落場首演即刻被踢傷膝頭，唔單止今晚無緣上陣，教練韋恩薛亞更證實呢位射手有排抖，真係黑過墨斗！奧格斯堡本身實力已經唔多夠，家陣連「救星」都話打埋柴，相信短期內都要繼續輸波喇。

對面嘅史特加雖然輸咗頭兩場波，但上仗對住勁旅利華古遜只係僅失一球烏龍波，而且首仗對緬恩斯力戰僅敗，其實表現真係唔算太曳。佢哋呢兩場波更加製造咗唔少埋門機會，夏歷同伊比斯域呢對箭頭見慣大場面，始終有一定質素，回復狀態相信只係時間問題，今場對住奧格斯堡就係爭番信心嘅最好機會喇。
頂占筍盤：史特加（讓球客勝）