費倫班底厚主場狂碌卡

猪拉多纳

意甲重開，Ali今季首次同大家見面，今晚上演一場獨腳戲費倫天拿主場對卡坦尼亞，上季聯賽殿軍費倫天拿季前雖然將首席射手祖維迪賣咗畀曼城，不過球隊更加用心擴軍，目前陣容比上季更平均，攻力更勁，而且季前準備充足，今晚主場第一擊迎戰實力比上季削弱嘅卡坦尼亞可響頭炮，1.4倍主Ｗ可視為過關重心，單頭捧埋1.78倍入球大同2.2倍「讓球主勝」。

（周二凌晨2時45分開賽）

費倫賣走祖維迪，收到2,600萬歐元轉會費，但球隊反而加重投資，單計暑期買人就用咗超過3,000萬歐元，其中花費1,550萬歐元由德甲班霸拜仁慕尼黑引入嘅馬里奧高美斯，被預期足以取代祖維迪位置，此外，佢哋重金收購咗巴勒莫進攻中場伊利錫同烏甸尼斯守將古達度，其餘有分量新兵仲包括保頓守將馬高斯阿朗素、馬拉加進攻中場祖亞昆、利雲特門將梅路亞同安德列治射手耶高雲高，球隊兵源同攻守實力比上季更強，少帥蒙迪拿亦着重季前準備，踢咗大量熱身賽，較早前亦踢過一場歐霸附加賽首回合硬仗，費倫天拿作客憑出色表現以2比1擊敗瑞士草蜢，相信狀態已經到位。
卡坦尼亞作客腳軟

卡坦尼亞上季聯賽排第8比預期更好，但完全係靠主場搵食，作客成績排尾4，今季球隊大換血，流失咗中場重心盧迪、主力守將馬查斯同二號射手艾真度高美斯，新兵就唔見有乜大卡士球員，而且人腳變動大磨合需時，季前準備唔算積極，熱身賽所見即使遇弱旅亦失波甚多，今晚作客面對費倫天拿凶多吉少。