辛尼特炒起費利拿

猪拉多纳

歐聯附加賽早場有俄羅斯勁旅辛尼特主場鬥葡超費利拿。辛尼特首回合作客大勝4比1，實力明顯高幾班，「讓球主勝」或「半場主勝」均可取。

（有線61及64台周四凌晨零時直播）

今場可以講係附加賽中實力最懸殊嘅對決，辛尼特對上兩屆都能進身32強分組賽，費利拿則係首次踢歐聯，從首回合比賽過程及比數足以反映兩軍差距有幾大。辛尼特陣中除有侯克、丹尼艾維斯、基沙哥夫、韋素等好手，今季仲搵咗前拜仁中場泰摩斯卓克及阿仙奴中場艾沙維回巢，兩人都係辛尼特08年贏得歐洲足協盃（歐霸盃前身）冠軍嘅主要功臣，無疑令球隊實力、經驗更上一層樓。

費利拿上季意外取得葡超季軍，從而取得附加賽入場券，但球員始終冇咩大賽經驗，既然現時晉級前途凍過水，倒不如慳番啖氣留力踢聯賽。睇埋費利拿對上三次輸波都係半場已落後，除「-1」，可捧埋「半場主勝」。
些路迪搶攻博「大」霧

另一場蘇超班霸些路迪主場鬥哈薩克卡拉簡迪，些路迪首回合作客輸0比2，今返主場一定要搶攻，不過卡拉簡迪踢法夠實際，前線有身高6呎嘅中鋒基斯連真高衝鋒陷陣，隨時撞散些路迪防線，今場最好捧大盤。

（有線62及202台周四凌晨2時45分直播）