敲馬體會先入波

猪拉多纳

近3次對巴塞搶韁破關

今晚西超盃爆發次回合生死鬥，巴塞隆拿返魯營主場同馬德里體育會再決高下。首回合雙方打和1比1，巴塞唔會因為有作客入球優勢而唔攻，但球王美斯受傷影響火力，齋有控球而欠效率，隨時被「床單兵團」快速反擊偷到雞，斯維冷敲3.55倍馬體會「第一隊入球」。

（now 632周四清晨5時直播）

無論任何對手，巴塞的控球率閒閒地都過六成，但當美斯受傷或缺陣時，佢哋就變得老鼠拉龜，經常得勢不得分，上仗聯賽僅勝馬拉加一粒便是最佳例子。巴塞該仗雖然圍攻對手，並且換入「新比利」尼馬，但缺少爆發力強的美斯，沙維與恩尼斯達組織的進攻就變得隔靴搔癢，前鋒柏度洛迪古斯更一次射門都冇，認真羞家！
巴塞主攻啱胃口

由於有一個作客入球在手，就算今場互交白卷巴塞都能捧盃，不過「地上最強」一向唔踢守勢波，何況在魯營主場定必主攻，可以話正中馬體會下懷。「床單兵團」在教頭施蒙尼調教下防守硬淨到暈，首回合馬里奧蘇亞雷斯、基比、高甸及佐治高基等悍將合力搞到巴塞冇啖好食，美斯仲受傷離場，就算趕及復出都唔慌弗喇。

馬體會唔單止佈防嚴密，從首回合可見「三叉戟」韋拿、阿達杜倫及迪亞高哥斯達的反擊快過打針，三扒兩撥就直插對方心臟地帶，今仗巴塞大舉出擊，唔多穩陣的後防會暴露更多空位，啱晒佢哋玩偷襲。其實馬體會至少要取得一個作客入球才有爭標機會，況且球隊近三次交手都能率先攻破巴塞城池，可睇準機會作出致命一擊，馬體會「第一隊入球」有3.55倍非常抵玩。