水手「抖夠」鋤紅鑽

猪拉多纳

今晚嘅日職大戰，好可能決定今季邊隊攞冠軍，橫濱水手喺主場對浦和紅鑽，讓平半值得博。最近有調查顯示，水手嘅真正比賽時間係日職最少，平均每場有39分鐘「攤抖」，難怪兩個「70後」馬昆奴斯同中村俊輔咁鬼生猛，有佢哋幫手上盤捧得過。

（有線61及201周三晚6:30直播）
每場真正打51分鐘慳體力

現時水手以1分領先紅鑽，個人認為，佢哋比榜首嘅廣島三箭更有冠軍相。雖然水手日前作客以1:2不敵鹿島鹿角，但其實37歲射手馬昆奴斯接應35歲隊長中村俊輔嘅「藝術傳球」先開紀錄，為乜賽程咁密佢哋仲咁勁？原來水手平均每場得51分鐘左右真正比賽，屬於日職最少，慳番好多體力o架！

事實上，馬昆奴斯近9場得1次冇波入，包括喺熱身賽射爆過曼聯大門，而且佢加盟水手以來，已經連續3次喺聯賽對紅鑽入波，今場隨時又發威。咁當然，紅鑽近況都好掂，日前作客以2:0解決清水心跳後，近5場有4勝1負，問題係佢哋防線不穩，作客清水又有4個球迷鬧事畀警察拉咗，麻煩事太多要唔過。