史特加殘兵難翻身

猪拉多纳

歐霸盃附加賽次回合今晚連環爆發，史特加喺主場再遇列積卡，隨時衰多鑊。雖然史特加高層撳緊急掣炒咗教練拉巴迪亞，不過唔夠中堅用嘅問題，並唔係新教練湯馬士舒尼達可以解決，對家列積卡未踢過歐聯或者歐霸盃分組賽，係時候創造歷史，捧3.75倍「讓客」！（開賽時間：周五凌晨0:00）
中堅兵源告急4場喪失8球

除咗新加盟嘅中場馬高洛查士受傷，後衞尼達美亞打柴後，作為隊長嘅泰斯治都宣布膝部韌帶撕裂長抖，加上中場奧達爾同迪達維未好番，開季冇耐已經成隊殘兵咁嘅款。咁大家應該明白，點解史特加會遭遇4連敗，包括首回合以1:2慘負列積卡，日前喺德甲作客以同樣比數不敵奧格斯堡啦！

當然，史特加高層喺次回合前落柯打炒拉巴迪亞，安排助教湯馬士舒尼達頂上領軍，證明佢哋好想拎到歐霸盃分組賽入場券，搵番啲獎金幫補，弊在家陣傷兵滿營，而且尼達美亞同泰斯治受傷後，中堅位置兵源告急，對上4場史特加喪失8球，各位唔係諗住佢哋依家條豆腐防線可以保持清白啩？
克羅地亞列積卡搏命創歷史

另一方面，列積卡喺克羅地亞冇乜點威過，不過佢哋陣中有幾個波斯尼亞外援，對於効力史特加嘅國家英雄伊比斯域，肯定非常熟悉，照計會有辦法睇住對方，所以首回合完場前執番粒嘅伊比斯域唔容易再發威。更何況，列積卡從未踢過歐洲賽分組賽，難得創造歷史在即，並且有機會瘋狂掘金，點會唔搏命呀？

猪拉多纳