士砵亭 賓菲加搶攻吼半大

猪拉多纳

一掃近年頹風，開季兩戰全勝高踞榜首嘅葡超老牌勁旅士砵亭，今晚火併老對手賓菲加，肯定會食住個勢，一開波就搶。至於開季表現失望嘅賓菲加，為怕得罪球迷，睇怕一樣唔敢死守，要入2球或以上開出2.6倍半場大又有幾難？（開賽時間：周日凌晨3:00）

士砵亭今季放走射手雲禾夫斯雲高，個個都以為佢哋會繼續衰落去，點知新加盟嘅哥倫比亞射手費迪蒙迪路一樣猛料，開季兩戰已入4粒。防線方面，小將中堅泰亞高艾羅尼天分十足，但佢近排獲包括利物浦等多間大球會垂青，轉會窗臨關閉前能否專心應戰真係難講，稍一不慎或連累球隊半場失波。

開咧戰不敵馬里迪莫嘅賓菲加，上仗補時連入兩粒反勝基維辛迪真係執身彩，麻煩友前鋒奧斯卡卡度素因為上季尾葡盃決賽推撞主帥佐治捷西斯，到依家都未獲得解凍，但佢周一已啱啱歸隊復操，相信其餘前鋒隊友都會感到壓力，今仗會全力爭取入波。只要兩隊都肯攻，半場當然大得起啦！