韋斯咸夾慣夾熟半勝穩陣

猪拉多纳

今季英超帥位出現大變動，除咗曼聯、曼城同埋車路士齊齊易帥外，連史篤城都換咗由曉士領軍。佢哋依家成班球員明顯仲適應緊新踢法，今晚作客夾慣夾熟嘅韋斯咸，隨時半場就落後對手，2.45倍「半場主勝」抵玩。（now623台周六晚10:00直播）
史篤城未適應曉士新踢法

有傳史篤城嫌前領隊佩尼斯嘅傳統英式踢法唔好睇，所以今季搵嚟曉士執教，冇錯，就係嗰位上季為大事擴軍嘅昆士柏流浪寫下開季12場聯賽不勝嘅領隊。佢今季減少史篤城長傳嘅同時亦搞到後防唔多穩陣，佢哋連續兩場聯賽都喺半場就落後，就連弱旅水晶宮都偷到雞，就知班波仲未適應到新踢法，今仗隨時半場未到又已經失守。

對手韋斯咸連續兩場聯賽保持清白身，防線表現硬淨。將帥之間冇出現咩大變動，自然有利班波喺季初發揮搶分。最緊要係主帥艾拿戴斯善用失意軍人，相信新加盟嘅翼鋒達寧好快就可以融入隊波，提供彈藥畀前鋒邁加同擅長殺入禁區搵食嘅中場祖高爾、路蘭，一於支持佢哋連續3次喺主場出戰就喺半場領先對手。