華倫蝙蝠洞唔赦巴塞

猪拉多纳

Super Sunday壓軸好戲，西甲擂台躉巴塞隆拿要作客「凶地」馬斯泰拿球場火併華倫西亞。巴塞上周中雖然勇奪西超盃，但剛傷愈嘅球王美斯面對馬體會球員嘅殺傷戰術，踢到就住就住，完場前更射失12碼，明顯未弗。西班牙《機密報》爆料，由於「新比利」尼馬仍未適應西甲節奏，就算美斯今仗因傷避戰，教頭馬天奴亦唔打算冒險讓「新比利」打正選，影響攻力。

華倫喺馬斯泰拿球場對巴塞特別有計，近六次「地上最強」造訪此地只曾一勝，「蝙蝠兵團」上仗被愛斯賓奴反勝，今仗一定會打醒十二精神，布下天羅地網迎敵，隨時令巴塞老鼠拉龜，「讓球主勝」有2.5倍非常值博。（now 632周一凌晨3時直播）