西布朗走樣啃唔落天鵝

猪拉多纳

安歷卡冇Mood好難入波

今夏先加盟西布朗嘅法國射手安歷卡，上個禮拜突然話想退休，據聞係因為佢嘅經理人逝世，令佢對足球無晒興趣。好彩最後奇勒落力勸說令安歷卡回心轉意，今晚西布朗主場迎戰史雲斯，安歷卡都會列入大軍名單，之不過冇晒Mood嘅安歷卡，係咪可以救到西布朗？小妹就覺得好難喇，佢哋根本讓唔起史雲斯，熱捧1.5倍「讓球客勝」最明智。

昔日嘅英超魚腩西布朗，近季嘅成績有番啲起色，上季仲以第8名完成球季，令人刮目相看添。不過今季西布朗又打回原形，喺首輪比賽作客0:0和愛華頓尚算可以接受，但第2戰喺主場以0:1不敵修咸頓，就完全反映出佢哋嘅鋒力極度疲弱，其中一個原因，當然係季前佢哋放走咗好多主力啦，當中最大敗筆，就係用安歷卡取代年輕力壯嘅盧卡古！
西布朗星散打回原形

從近兩仗可見，安歷卡嘅威力已大不如前，而且呢位法國射手心情極度低落，夾硬逼佢上陣，分分鐘有反效果。事實上，用過氣球星擔大旗，上季昆士柏流浪已經有辦你睇，西布朗竟然仲走去重蹈覆轍，若然到季尾落得QPR降班嘅下場，完全係咎由自取。
史雲斯上季作客有料到

另邊廂嘅史雲斯，開季兩場英超輸晒不特止，計埋得失球差嘅話，史雲斯仲要包艇添。不過咁，查實史雲斯開季輸嗰兩場波，對手分別係曼聯同熱刺，拎唔到分真係非戰之罪。睇番「天鵝」嘅人腳，同上季基本上係一樣，冇理由會突然走樣，而且佢哋近10場作客比賽有7勝1和2負，入29球失4球，名副其實攻得又守得，所以今晚西布朗學人讓波？當然要捧受讓嘅史雲斯「讓客」啦！