AC出真功夫再o趙卡利亞里

猪拉多纳

AC米蘭殺入歐聯分組賽，總算放下心頭大石，終於可以專注番聯賽。「紅黑軍」今晚將會喺聖西路球場對卡利亞里，相信佢哋可以承接上仗氣勢，大炒一向食慣嘅卡利亞里，2.05倍「讓主」要追。

（開賽時間：周一凌晨2:45）
近3次主場對賽都大勝

有統計話AC上季打入歐聯16強，獎金連其他收入一共進帳超過5,000萬歐元（約5億港元），比起喺上屆歐霸盃8強出局嘅拉素所賺不足1,000萬歐元，真係有天淵之別，難怪AC喺上星期嘅意甲開咧戰要留力歐聯啦！所以即使「紅黑兵」作客敗走維羅納1:2，仍然不足為據。好喇，既然AC殺咗入歐聯分組賽吸金，當然可以專心迎戰卡利亞里見真章啦！咪忘記「紅黑軍」已連續3次喺主場贏卡利亞里2球或以上，最近又有前祖記射手馬特尼來投，前鋒巴洛迪利同艾沙拉維今晚一定要爭表現，再次大開殺戒有乜出奇先？

對手卡利亞里防線大將艾斯托利盛傳扭計博離隊，相信佢同上星期一樣唔會落場，最慘係卡軍今季起用小將尼高拉穆魯踢左閘，上仗對阿特蘭大都已經好似唔多掂咁，今晚仲要作客聖西路喎，好易怯場出醜o架，撐AC「讓球主勝」啦！