保亞斯識計數 用巴利1換7

猪拉多纳

過去一周評述咗兩場「互交白卷」無紀錄嘅比賽，味道卻截然不同。曼聯同車路士嘅大戰固然令雙方擁躉失望，尤其係莫連奴嘅「無鋒陣」唔單止未能帶嚟驚喜，趨向被動防守嘅打法更成為呢場悶戰元兇；而馬體會摸和巴塞嘅西超盃次回合，雖然同樣無入球，但技術含量和精彩程度就高得多，球迷熬更抵夜捧場亦唔會呻笨！

今晚超級星期天同樣有兩場大戰。頭場「雙紅會」係傳統大戰，兩雄今季發揮亦佳，利物浦進攻流暢兼兩仗不失令人驚喜，可惜新加盟嘅阿里施蘇高同埋高路托尼有傷、蘇亞雷斯又要坐波監，未能夫添一戰；至於曼聯就忙於喺最後關頭斟介幾位心儀球員，好似迪羅斯、費蘭尼同莫迪歷等等，睇怕湯卡華利、卡域克係時候盡騷Quali，唔係新兵嚟到隨時冇碇企。

尾場嘅北倫敦打吡，精彩度相信唔會比「雙紅會」曳。呢場被喻為係「守財奴」同「闊少爺」之戰，阿仙奴領隊雲格年年都話想爭標，但受制種種原因至今仲未能購得心頭好，加上首戰失利，結果廣受批評，好彩班波喺歐聯附晉級，叫做暫鬆一口氣。儘管雲格盛傳喺轉會窗關閉前力爭簽下皇馬3員猛將，但相信機會渺茫，隨時又係煲無米粥。

講到買人效率，熱刺主帥保亞斯就「講得出，做得到」，賣走一個加里夫巴利，換入7名猛將如荷西保連奴、蘇爾達杜等，仲要個個都係好波之人，整體實力同板櫈深度進一步提升，睇嚟雲格呢方面要好好學習。