奧連特三叉戟弗爆繼續追

猪拉多纳

要講英甲開季最Fit嘅球隊，肯定非奧連特莫屬。佢哋喺聯賽取得5連勝之餘，隊中三叉戟嘅威力絕對唔講得笑。佢哋今晚要喺英格蘭聯賽錦標第1圈作客狀態差到爆嘅基寧咸，有力延續佳績，2.2倍客勝值得一試。

（開賽時間：周三凌晨2:00）
基寧咸11戰不勝

奧連特今季咁威水，有賴前線三叉戟入波當食生菜，前鋒列斯比、戴夫穆尼同中場奧度巴祖5場聯賽一共轟入10球，試問基寧咸守得邊個。而且呢班波後防亦唔失禮，聯賽只係失咗2球，就算早前喺聯賽盃越級挑戰侯城，都係去到加時先以1球敗陣，況且中場柏迪、守將馬菲奧賓特利復出，陣容更見完整。睇番奧連特喺上屆都打入4強，佢哋明顯幾重視呢個比賽，唔似會「揸流攤」。

計埋季前熱身賽，對手基寧咸已經連續11場比賽贏唔到，狀態差到嚇死人。佢哋上仗喺主場迎戰同樣喺聯賽未開齋嘅布里斯托城，如果對手把握力好啲，真係1分都保唔住。佢哋依家士氣直插谷底，防中連根斯同後衞費殊仲要休戰，反底未係時候囉。