英意德缺主力 唔玩盤玩大細

猪拉多纳

賭波嘅嘢變化萬千，有時表面睇係「強隊對魚腩」，但實質上係「冇牙老虎遇豬頭骨」，勁旅分分鐘贏波輸盤，自己攞晒3分就唔益上盤客！世界盃歐洲區外圍賽聽日凌晨激戰連場，其中英格蘭、意大利同德國，都分別有主力因傷或停賽缺陣，面對弱旅，究竟用咩投X策略？等我哋話畀你聽！
進攻鐵三角停賽 意大利細打保

歐洲區B組意大利主場對保加利亞，意軍進攻「鐵三角」巴洛迪利、奧斯華度、蒙杜利禾一齊停賽，領隊柏蘭迪利準備改用4321陣式，派老將基拿甸奴打單前鋒，攻力大打折扣。其實意軍只要今仗榜首之戰唔輸，仍可保持出線優勢，加上連踢兩輪外圍賽，首場唔可以搏得太盡。保加利亞作客遇勁旅，但求不敗已收貨，預料會形成拉鋸局面，捧入球細。

（now 633及660周六凌晨2時45分直播）

意大利外圍賽6戰攻入12球，其中7球由巴洛迪利、奧斯華度、蒙杜利禾包辦，三人坐波監，影響有幾大可想而知，尤其缺少「巴神」，進攻冇晒睇頭。柏蘭迪利計劃用基拿甸奴打單前鋒，以基亞卓尼利及簡達華側擊輔助，難予人信心，加上意大利下周中會迎戰同組另一支爭出線勁敵捷克，今仗唔可以去得太盡，領先後肯定拉布保勝果。
保加利亞Hea碧退役缺攻力

保加利亞自從貝碧托夫退出國家隊後，缺乏一位領軍人物，陣中大部分球員効力本土球會，外流球員中，以阿士東維拉中場阿歷山大當尼夫、燕豪芬中場曼奴列夫比較有睇頭，後者曾喺首循環射破意軍大門，但今次去到意大利，會受到嚴密看管，恐難再偷雞。