德國奧地利安聯做大騷

猪拉多纳

波歷克告別 隊長拿姆百戰

C組榜首戰，德國喺拜仁嘅安聯球場迎戰奧地利，德軍今仗賽前會為前隊長波歷克舉行告別國家隊儀式，同時亦係現任隊長拿姆第100次代表國家隊，戰意鮮明，面對熟晒路又同屬攻強守弱嘅奧地利，入球大細調整到3.5球，黑柴照撐大盤。

（now 632周六凌晨2時45分直播）
小豬葛斯因傷缺陣

德國目前領先次席嘅奧地利5分，只要今場同4日後作客法羅群島贏波，就可以提早出線決賽周，雖然今仗唔齊腳，「小豬」舒韋恩史迪加、馬里奧葛斯、根度簡同普多斯基都因傷缺陣，不過兩名箭頭高路斯同馬里奧高美斯近期喺意甲都有貨交，今季改投慕遜加柏嘅麥斯古斯進步神速，前線火力強大，中場更人才濟濟，湯馬士梅拿、奧斯爾、馬高列奧斯、卻奧斯、達斯拿、舒賀爾尼同今季突飛猛進嘅悉尼森姆都極具創造性，足以對前線提供強力支援。

不過，德軍防線好唔穩陣，近3場熱身賽面對厄瓜多爾、美國同巴拉圭，合共竟然喪失9球，防線大將曉姆斯唔弗，球隊過去10次對奧地利有8次開大，德軍近兩次主場對奧地利都開出6比2呢個瘋狂波膽，證明雙方熟晒路唔使試探，一埋牙就會搏槌。

奧地利陣中除有7名球員効力德甲同德乙外，連艾雲舒捷斯同阿拿奧杜域上季都仲喺德甲効力，拜仁小將阿拉巴近三場外圍賽都入到波，球隊近3次對德軍亦有波入，今場作客唔會龜縮，兩軍好有機會再演入球騷。