東廐兵力強師徒齊攞彩

猪拉多纳

　　今日告東尼出馬多，與沈姚兩廐一樣，齊齊出馬10匹，以陣容來講，東廐整體兵力較強，睇個勢係對準開鑼日攞彩。

　　除了第四場之外，東廐場場有馬出，有機會爭勝數目眾多，但未必單單靠晒徒弟蔡明紹，其中第二場「羅馬神駒」，擺個呂卓賢上去，唔使負頂磅，已經有唔同計法，而呢匹馬靠放食胡，用細路仔一條心，有理冇理2檔一早搶頭，馬少場合，撞正唔多對手會放，隨時貼欄愈走愈順，有力帶到；第三場「夢幻十一」，用得楊明綸，上季呢對騎練炮製唔少冷W，呢匹路程專家檔好，只要跑啱形勢，分盡馬季初一樣起到作用。

　　至於關照徒弟6駒之中，睇好第五場「迎風飄揚」及第七場「美麗昇華」。前駒上季試過與「慣勝福星」構成連贏，四班唔會冇馬贏，睇賽前準備，立心搏首場；後駒上季尾轉到東廐，恍如重生，跑4場冇W有Q，潛力應該未盡，升至二班唔會失威，而且，今場對手之中，有部分唔係冇路程根據，就係唔夠班，相比之下，此駒條件確係出眾，排埋9檔，預計出閘後守到好位，可謂事半功倍。(Jack)