英超世盃連贏好難估

猪拉多纳

踏入8、9月，Peter偷得浮生半日閒，不斷睇英超及世盃外圍賽，發現列強各有隱憂，因此依家要估邊隊會成為今季英超盟主，邊隊會在明夏勇奪世盃，實在言之尚早。
英超6強機會均等

踏入後費格遜時代，曼聯仍要適應新帥莫耶斯的戰術，再非一枝獨秀，英超群雄逐鹿亂象叢生，「雙紅」利物浦及阿仙奴添兵兼開個靚頭，曼城在教頭比歷連尼調教下，攻力應比前任文仙尼更強，車路士領隊莫連奴雖係有料之人，但在重視壓迫踢法的現代足球，缺乏具級數的防中乃兵家大忌，熱刺用加里夫巴利一人換來保連奴、蘇爾達杜、基斯甸艾歷臣、拉美拿等優質新援，可謂除笨有精，六隊機會均等，必有一番激鬥。

至於明夏世盃七大勁旅，亦冇一隊係鶴立雞群。巴西雖有主場之利，但人腳絕非上乘，死敵阿根廷有球王美斯壓陣，可惜欠缺一名星級主帥指點江山，西班牙的傳控踢法已被人洞悉，隊長兼門將卡斯拿斯在皇馬坐冷板影響狀態，隨時成為衞冕絆腳石，德國人才輩出，惟獨缺乏頂級中堅坐鎮防線成隱患，加上荷蘭、比利時及意大利各有瑕疵，冇一隊特別標青。因此現階段要估一條今季英超+明夏世界盃的冠軍連贏位，Peter都覺得十分困難。
金句：今季的英超+明夏世界盃＝超難估的冠軍連贏位