鯨魚出副選攻「細」唔慌多

猪拉多纳

日皇盃第2圈今日繼續開戰，名古屋鯨魚喺主場對長野帕塞羅，未必炒得起對手，冷敲2.4倍入球細好過。雖然鯨魚牌面贏晒，不過日本傳媒話，佢哋今場波唔會用最強陣容應戰，包括射手約舒亞堅尼地、玉田圭司等全部唔踢，相反，帕塞羅有唔少球員踢過日職或者日乙，戰鬥力冇想像中咁差，應該頂得吓o架！（開賽時間：周日下午2:00）
前鋒拍檔堅尼地 玉田圭司缺陣

假如雙方都以強陣出擊，日職勁旅鯨魚同非聯賽嘅帕塞羅牌面當然差咁幾班啦，但日本消息話，鯨魚喺今場波主要起用年輕球員，配合一班唔係成日有得踢嘅後備兵迎戰對手，意味住王牌射手玉田圭司、中場小川佳純、「新郎哥」阿部翔平等主力都會休息，加上另一件中鋒約舒亞堅尼地被澳洲徵召踢太公波鬥巴西，就算中場藤本淳吾主動要求擔正，最近由比甲標準列治外借回歸嘅前鋒永井謙佑（左下圖左）又話想搏殺，但個陣天殘地缺，佢哋班隊友質素又未必話好高，想炒起對手真係有難度。
帕塞羅有幾件前J咧球員

對家帕塞羅係有骨魚腩，佢哋今季由帶過德島漩渦嘅美濃部直彥執教，陣中又有幾件踢過日職同日乙嘅球員，包括前FC橫濱射手青木翔太、踢過岡山綠雉嘅中場大道廣幸、美濃部嘅愛徒後衞平島崇等，對住鯨魚班二打六，只要肯守，真係未必會被大敗o架。
賽制

日皇盃現階段為第2圈，若法定時間內打和將加時30分鐘，未分勝負則互射12碼決勝。