「巴甲1哥」高士路奔猛火追得過

猪拉多纳

上仗贏波後已穩奪巴甲半程冠軍嘅高士路，聲言會以奪得聯賽冠軍為目標，聽朝凌晨主場迎戰法林明高，絕對有能力利用全聯賽最強火力轟散對手，一報喺巴西盃被淘汰之仇，一於捧2.2倍「讓主」啦！（廣東體育周一凌晨3:00直播）
法林明高攻不銳守不穩

高士路憑住18場入41球嘅超強火力，暫時同喺聯賽榜次席嘅帕拉尼恩斯拉開4分差距，今場無論贏定輸都肯定成為巴西半程冠軍，不過後衞美基洛查就話唔心足，皆因全隊目標係聯賽冠軍，今場當然要入多幾粒啦！「一哥」咁好火，全靠弗爆嘅安捷斯、阿拉奧祖同埋盧卡斯施華等攻擊手齊齊分擔數胡重任，入球點夠晒分散，對手想防都防唔到，而且教頭馬些路奧利華拉放膽起用老而彌堅嘅巴迪斯達，佢老人家連續兩場聯賽都有波入，今場肯定同班拍檔夾手夾腳炒起法林明高，報番喺巴西盃8強畀對手踢出局嘅一箭之仇啦！

相反喺聯賽榜位列中下游嘅法林明高近況並唔理想，近5場聯賽只係贏過1次，當中3場食白果，如果唔係靠前鋒靴蘭尼單天保至尊，排名分分鐘跌得仲低！最慘係鋒線唔掂之餘，後防近7場巴甲只得1次可保清白身，攻守都唔掂，想唔畀人炒都難喇。