美斯掛帥喪攻巴拉圭

猪拉多纳

阿根廷、哥倫比亞只要雙雙和波，就可以率先搶到2014世界盃決賽周嘅入場券，但兩軍人強馬壯，又點會咁衰仔計到盡求和！世界盃南美區外圍賽進入白熱化階段，阿根廷召入美斯幫手「撲飛」，去到巴拉圭地頭肯定勁開火；哥倫比亞、烏拉圭兩雄相遇又必有惡鬥，等睇入球騷啦！

阿根廷有美斯、阿古路、迪馬利亞助陣，不嬲以攻代守，攻力有幾強唔使介紹；最過癮係巴拉圭都火力全開，老將辛達告魯斯弗到爆炸，為保「世盃夢」，主場出擊唔怕同「藍白兵團」駁火，今場咪理邊個贏，捧大最好！

（周三早上9時40分開賽、馬會網上文字直播）

睇番今次南美洲區形勢，因為巴西係主辦國唔使打外圍賽，阿根廷可謂鶴立雞群，目前高踞榜首係意料之內，哥倫比亞緊隨其後，雙方現時均有26分，只要哥倫比亞於較早時間開波嘅賽事唔輸畀烏拉圭，阿根廷作客巴拉圭唔使贏都力足出線。事實上，「藍白兵團」成功進軍巴西只係時間問題，之前2場外圍賽，球隊有美斯缺陣下和晒，今輪領隊沙貝拉見希古恩停賽，就召入美斯壓陣，再加埋阿古路、拿維斯同柏拉斯奧，可輕易撕破主隊防線。不過，球隊中、後防大將馬斯真蘭奴同加雷亦要坐波監，防守力比平時更信唔過，想保持清白之身，堅難。
巴拉圭出局邊緣冇保留

連續4次殺入世盃決賽周後，巴拉圭今次出閘脫腳，連炒2個領隊後搵得域陀真尼斯掌舵，上仗雖大炒玻利維亞，但仲係排緊尾二。計番條數，巴拉圭今場贏波，仲有極微機會搶到第5名踢附加賽，冇理由唔搏埋佢，加上近2戰球隊轟入7球，強如德國都要失3粒畀佢哋，捧大啦！

猪拉多纳