荷蘭求安心「半場大」

猪拉多纳

D組賽事，荷蘭上一輪意外在愛沙尼亞身上失掉兩分，但對出線前途影響不大，事關只要佢哋今晚作客擊敗魚腩安道爾，同時間羅馬尼亞未能擊敗土耳其，橙色軍團便可穩奪小組首名直接出線資格。基於兩軍實力差距太大，波童認為荷蘭可以早早領先奠定勝局，首選「半場大」。

（周三凌晨2時30分開賽）

相信上仗賽前冇咩球迷估到荷蘭作客愛沙比亞，要靠尹佩斯補時階段嘅12碼先至逼和對手2比2搶番一分，其實荷蘭球員喺早段先開紀錄後，心態上確有少許放鬆，所以先畀到對手機會偷雞。安道爾今屆外圍賽7戰全敗，得0球而失22球，反撲力難同愛沙尼亞相比，荷蘭球員吸取上仗教訓，一定想盡快入多幾粒，留番啖氣周末返聯賽搏殺，上半場贏兩球唔難。
羅馬尼亞或送橙軍一程

荷蘭攞3分冇問題，但能否提早訂機票去巴西仲要睇羅馬尼亞對土耳其嘅戰果。羅國落後荷蘭6分，只領先土耳其3分，贏波嘅話數字上仲有機會做最終一哥，輸波唔只冇機會直接出線，仲可能被緊隨其後嘅匈牙利或土耳其趕過，因此應以穩為先，形勢上唔使急攻，所以有機會造就荷蘭提早出線。