阿根廷入球騷「拉」客

猪拉多纳

巴西係2014世盃主辦國，唔使踢外圍賽自然益晒宿敵阿根廷，呢支勁旅家陣喺南美洲區外圍賽也文也武，如果其他戰果啱嘴形嘅話，聽朝隨時未開戰就已經攞到決賽周入場券，出線坐定粒六，戰意有幾多真係好難講。況且阿根廷受傷停問題困擾，今場足足有4位防守大將唔出得，聽朝造訪一心搞破壞嘅巴拉圭唔係贏硬，既然兩隊火力都有番咁上下，捧1.95倍大似乎最穩陣。（開賽時間：周三早上9:40）
阿根廷4大守將缺陣

揸住26分嘅阿根廷係南美洲區外圍賽「一哥」，由於今戰係本輪外圍賽嘅壓軸戰，如果較早開波嘅厄瓜多爾及烏拉圭有咩冬瓜豆腐，咁阿根廷隨時喺開戰前就篤定躋身決賽周，亨格比利睇唔出佢哋嘅戰意會有幾高昂。再講，今場波阿根廷除咗有射手希古恩要停賽，最大劑係一對中堅加雷、費達歷高費南迪斯同防中馬斯真蘭奴都要坐波監，加上左閘馬高斯盧祖因傷缺陣，即係話阿根廷足足有4位中後場要員唔出得喎！

佢哋前日喺位於布宜諾斯艾利斯嘅埃塞薩練完波之後，領隊沙貝拉向記者話已經度掂11個正選陣容，當中美斯會聯同迪馬利亞、阿古路同腳風幾順嘅柏拉斯奧合組「四叉戟」，後防就搵甘柏拿路同巴辛達兩位散仔擔正，有前冇後，巴拉圭要撕破阿根廷大門唔係冇機。
巴拉圭下調票價爆撲飛潮

係，今仗喺首都亞松森出擊嘅巴拉圭基本上已經Game Over，唔單止要望隔籬嘅烏拉圭輸畀哥倫比亞，自己亦要砌低阿根廷先有望爭踢附加賽，難度極高。之不過領隊真尼斯似乎已經放眼將來，今次大軍總共揀咗6位「90後」入伍，賽前記招亦冇講過咩要保住一絲出線希望嗰啲行貨嘢，反而話要「Try to damage」，擺明要存心搞破壞落阿根廷面。

查實自真尼斯上任後，巴拉圭已經有逼和德國3:3同大炒玻利維亞4蛋嘅佳績，兩仗狂入7球嘅表現令人眼前一亮。消息話巴國足總仲將今仗票價定到最低10萬巴拉圭瓜拉尼（約173港元）一張刺激入座率，搞到球迷瘋狂撲飛，咁多鄉親父老撐場，相信巴拉圭就算輸，都肯定搏命隊番一至兩粒交代啦！
Data King：交手旺開半場大

‧巴拉圭連開4口大。

‧阿根廷近兩次造訪巴拉圭都輸波。

‧雙方近兩次交手都開半場大。