1.54倍主勝咪嫌熱 明尼路齊章奏凱「哥」

猪拉多纳

明尼路聽朝喺巴甲主場迎戰哥列迪巴，繼續有朗拿甸奴鋪橋搭路組織攻勢，兩名防守核心坐完波監更令陣容回復完整，今場面對前線大傷「鋒」兼夾作客腳軟嘅哥列迪巴，筆者睇好明尼路能夠高奏凱「哥」，熱食1.54倍主勝。

（開賽時間：周五早上8:00）
哥列迪巴係「作客蟲」

明尼路防守中場祖殊前排傷患纏身，另一名防中比亞爾同中堅利華漢拔圖上場更加雙雙停賽，搞到近期防守漏洞百出，唔係領先後守唔穩被逼和，就係早早落後再艱苦扳平。不過，呢幾名主將今場終於齊章，成功穩固防線之餘，再配合老而彌堅嘅「細哨」負責派牌，要贏波重拾勇態簡直係Easy Job。

另方面，哥列迪巴今季9場聯賽作客贏得1場不特止，連同南球盃嘅話，佢哋目前更陷入4連敗劣勢，名副其實係「作客蟲」。再者，迪維迪與施薩達施華呢對前線拍檔，現時一個養傷、一個啞火，副選安達臣艾基奴同拿費爾達施華又抖緊，依家靠晒即將踏入36歲嘅中場阿歷士撐起隊波，但今場想攻破防守固若金湯嘅明尼路，怕且好難。