曼聯半場破宮

猪拉多纳

爆炸頭紅魔處子騷孭飛空襲

英超早場由衞冕曼聯主場迎戰升班球隊水晶宮，「紅魔鬼」主帥莫耶斯搵到嫡系猛將費蘭尼幫手，呢個比利時爆炸頭今戰會擔正撐起中場，大軍經過聯賽兩戰不勝兼冇士哥後，實會變身急先鋒施展猛烈進攻，預期半場已可解決對手，捧「半場主勝」！

（now 621周六晚7時45分直播）

曼聯新帥莫耶斯今夏增兵諸多阻滯，兜兜轉轉最終都係簽番愛華頓舊部費蘭尼，查實「紅魔鬼」現時最缺乏莫迪歷呢類創造型中場，但簽到費蘭尼呢個全能中場總算好過冇，佢擅於利用爆炸頭擾亂對手視線，搶頂成功率極高，可增強中場空戰能力，佢同時可以後上攻門，令球隊多瓣進攻板斧。曼聯射手朗尼因傷頭缺陣，右閘拉菲爾達施華及菲爾鍾斯有傷上陣成疑，其餘主將都可候命，夠殺啦！
水晶宮蛇無頭捱打

水晶宮上季升班兩大功臣係格連梅利同韋費特沙夏，前者仍然養緊傷，後者加盟咗今戰對手曼聯，將會掉轉槍頭，令兩隊差距進一步拉遠。經過三周聯賽後，三支升班球隊都成功開齋，水晶宮休戰前成功砌低新特蘭，發揮確係唔錯，但講到組織攻勢嘅能力，佢哋唔及侯城同卡迪夫城，踢落冇乜章法，今次去到奧脫福睇怕都係捱打。水晶宮教頭荷路維今戰仲要停賽，只能遙控球隊，相信凶多吉少。

雙方最近一次碰頭係喺2011至12年度球季聯賽盃八強戰，當時水晶宮爆大冷喺作客環境下加時後贏二比一，不過，當日「紅魔鬼」幾近派出全副選，前面用馬捷達同馬美迪奧夫呢類後備兵，戰績不能作準。經過連續兩場硬撼車路士同利物浦加埋僅得一分後，曼聯新帥莫耶斯已感受到壓力，今次一定會落柯打要班兵速戰速決，一於熱捧「半場主勝」！
領隊Chit Chat

莫耶斯(曼聯)：費蘭尼技術出眾，可以適應中場唔同位置，又識入波，可以令球隊變得更強。佢依家仍然好年輕，仲有大把進步空間！

荷路維(水晶宮):我深信班兵夠料打英超，今場唔會泊架巴士喺門前。兩年前我喺電視睇過水晶宮點樣砌低曼聯，希望可以重溫好夢啦！