維拉愈戰愈強打鵲冇難度

猪拉多纳

無論係大公司定大球會，每隔三幾年總會有啲人事變動，當管理層換班時，不論政策同方向都會有唔同，就算個阿頭幾有料都好，點都要時間適應，情況就好似拜仁慕尼黑咁，新帥哥迪奧拿一定係有料之人，但現階段仍處於摸索期，若單以現時球隊表現就對佢作出評價，未免太急同太快！

哥迪奧拿能夠將巴塞隆拿打造成地上最強球隊，功夫仔梗係有番咁上下啦，之不過每間球會文化都唔同，佢去到拜仁既要安撫前朝遺臣，同時要為自己建立一個新班底，班波踢落難免會冇咁穩定，踢起嚟冇咁順亦唔難理解。由於拜仁被莊家評為歐洲頂級球會，例牌讓得辣，趁班波未夾熟，依家係反佢哋嘅最佳時機，今晚大軍主場對漢諾威讓得多，下盤值得留意。
紐卡素踢落唔對辦

講番今次重心場次，阿士東維拉主場對紐卡素，建議捧主隊！維拉上季沉淪榜下游，當時肥叔已經多番指出呢班波其實並唔係咁曳，而最終佢哋都成功留到級。死過翻生之後，維拉新季踢落果然唔同晒，頭幾場連撼幾大勁旅不落下風，真係唔講得笑！維拉個陣愈執愈好，今季一定唔使護級，反觀「喜鵲」踢落唔多對辦，今場維拉只係小讓平半，上盤有計啦！

（now 624周六晚10時直播）