愛華頓開咧3連和冇火 車仔踩油衝客W

猪拉多纳

比利時前鋒盧卡古喺轉會窗最後時刻畀車路士外借去愛華頓，今晚兩支「藍軍」對壘，雖然礙於借用條例，盧卡古唔能夠倒戈車仔，不過佢竟然話希望「拖肥糖」可以贏波，唔知莫連奴仲會唔會畀佢返去呢？嘻嘻！但睇番愛華頓開季至今3戰全部打和得3分，只排中下游位置，相反車路士喺「寸王」回歸後一開波已經撻着，3仗取得2勝1和佳績，無論戰績同人腳，車仔都贏成條街，今晚「藍戰士」食硬呢粒「拖肥糖」，一於捧2.08倍客勝！

愛華頓開季嘅成績認真麻麻，冇咗莫耶斯真係要一啲時間適應，開季3場聯賽分別對住諾域治、西布朗同卡迪夫城都贏唔到，聯賽盃對史提芬納治仲要踢到加時先贏2:1，對住實力一般嘅球隊都踢得咁辛苦，今場硬撼車仔點頂呀？
伊度奧再拍寸王有望登場

轉會窗關閉前最後一刻，愛華頓主力費蘭尼又轉投曼聯，冇咗呢個「爆炸頭」相信會對呢班波好大影響，代替佢嘅好大機會係新星巴克里，但論實力同經驗絕對比唔上費蘭尼，借用嘅盧卡古又唔出得，今場認真大鑊，就算有曼城借用新兵巴利登場，都未必幫到幾多手。

另邊廂，「寸王」喺季前已講到明今季要一統英超天下，開季表現亦令球迷滿意，暫時排喺積分榜第2位形勢唔錯。新加盟嘅喀麥隆前鋒伊度奧已經參加車仔操練，今晚有望正選上陣，佢効力國際米蘭嗰陣同莫連奴合作無間，成功幫國米成為「三冠王」，佢哋再次合作隨時又擦出火花。加埋伊雲洛域、林柏特同奧斯卡杜斯山度士，無論戰績同人腳實力，車仔都贏愛華頓一大截，就算今晚作客都冇有怕，一於捧車路士客勝！