拜仁攞慣「威」-2照撐「主勝」

猪拉多纳

踢完國際賽之後，今個周末又輪番歐洲各大聯賽做主角，已經連續29場聯賽不敗嘅拜仁，今晚喺主場迎戰漢諾威。既然拜仁一向食住對手，仲要有中場舒韋恩史迪加復出，有力大數陣容不整嘅漢諾威，讓2球都冇有怕，照追1.73倍「讓主」。

（有線61、64、201及203、中央5台周六晚9:30直播）
漢諾威作客失波多

講往績，兩軍近6次喺安聯球場對碰，拜仁贏晒之餘，有5次坐底炒對手3球。或者大家擔心拜仁分心下周中歐聯，但佢哋到下周三凌晨先喺主場出戰莫斯科中央陸軍，唔使特別留力。中場舒韋恩史迪加喺周二復操，相信今晚可以落場領軍，令球隊攻勢更流暢。新兵馬里奧葛斯、堤亞高艾簡達拿受傷，反而有利夾慣夾熟嘅拜仁球員發揮，尤其是前線殺手文迪蘇傑同洛賓喺上場國際賽休息，今仗肯定全力開火。

漢諾威開季取得3勝1負佳績，但睇真啲佢哋贏嗰3場全部主場出擊，一作客就0:3輸畀慕遜加柏。咪忘記佢哋上季聯賽係作客失球數字最多，今場仲要冇咗射手馬美迪奧夫、中場捷雲度奴、侯斯迪同後衞彭達幫手，點同拜仁鬥？睇怕今晚都要喺個龍門度執多幾次波出嚟喇！