季初專攻田草吼東廐7、10場

猪拉多纳

　　告東尼開鑼日連中三元好威水，上期谷草夜賽則幾乎冚晒旗，熱門如「牛精好友」、「寶正勁」、「四季星」，統統跑到冇P，只得「牛精仔」入位，「東粉」肯定補唔番條數。

　　或者，季初東廐都係集中火力在田草，呢次佢在較後場次「枕」咗批惡馬，其中以第七場及第十場最好，一場出3隻、另一場兩駒應戰，呢兩場應該最有機會贏馬。

　　廣東讓賽出三駒有計

　　第七場跑盃，出馬10件，爭廣東讓賽，有「隨心隨意」及「連利多」在陣，成場啲飛可能扯得八八九九，熱晒呢兩隻。東廐3件火燒唔熱，論到機會其實唔會比葉高兩駒失色。「蓬萊仙子」最夾楊明綸，呢匹馬可能係翻版「夢幻十一」，專登搵阿綸博冷；「牛精大師」及「續領風騷」有級數，一放一追，有晒隊形，形勢好跑。

　　第十場「喜蓮芳芬」及「好好機會」，又係可以互相照應，因為前駒跑法屬於後衝一段，有廐侶開路的話，唔擔心步速慢追唔到，睇嚟「喜蓮芳芬」係行舊路，好似上季初，一出即搏。(Jack)