慕遜加柏四寶食得咸

猪拉多纳

多蒙特教頭畀晒貼士

德甲巨人拜仁慕尼黑上季完成三冠霸業，不過講到教頭嘅風頭就以近季帶領多蒙特中興嘅高普最勁，佢已經被欽點為未來德國國家隊主帥嘅熱門繼任人，多蒙特會方仲破天荒公告天下，將來無論發生任何事，都永遠唔會炒佢魷魚。

高普領軍出色，喺收購球員方面亦做得好，引入咗多位猛將，包括破球會轉會費紀錄嘅「阿美尼亞施丹」米希達利恩、「德甲新飛人」奧巴美揚同「希臘第一中堅」柏柏斯達夫普路斯，扣除賣走「金童」馬里奧葛斯所得收入，今夏只花咗五百幾萬歐元，球隊實力有增無減，受到德國傳媒大讚，不過佢話講組軍，多蒙特唔夠慕遜加柏醒，仲預期慕遜加柏今季會取得重大成功添！

多蒙特同慕遜加柏同屬德甲西部北威州，兩會昔日都曾經係德甲巨人，球會名字前同樣加有「Borussia」地名。黑柴年少時，無論睇雜誌定電視，都記得當時慕遜加柏嘅香港譯名就係「保路西亞」，足見兩會之間恩怨情仇，高普大讚呢隊死敵今季花少錢辦大事，隨時可以攞到下屆歐聯入場券喎！
作客「大」得起賀芬咸

慕遜加柏今夏先後以低價引入弗賴堡嘅德國國家隊前鋒新希望麥斯古斯，同埋基輔戴拿模嘅前哈化柏林巴西鋒將拉菲爾基達奴，兩人迅速融入球隊，配合原有嘅一老一嫩技術球員艾蘭高同靴爾文，組成威力驚人嘅「加柏四寶」，認真唔講得笑。

今晚慕遜加柏作客面對防線嚴重缺態，仲有兩名中場大將羅拔圖法明奴同沙利荷域缺陣嘅賀芬咸，黑柴信高普眼光獨到，強捧慕遜加柏平手盤同大盤。

（有線61及64台周日晚9時30分直播）