費倫着火大騷Encore

猪拉多纳

意甲早場費倫天拿主場鬥卡利亞里，雙方今季嘅表現都令Ali感到興奮，費倫天拿至今保持兩仗全勝，我認為係今季意甲三甲分子，不過防線漏洞多會成為爭霸最大障礙，今仗主場出擊贏面當然較高，但卡利亞里嘅反擊亦非同小可，今場估計雙方都會有波入，主勝賠率太低，Ali推介1.7倍大盤。

（周日晚6時30分開賽）

費倫天拿今季轉會工作做得好，來自拜仁嘅德國箭頭馬里奧高美斯，同原有鋒將基奧斯比羅斯一剛一柔配合得天衣無縫，至今兩人合作喺兩場聯賽已合共轟入五球，認真犀利，佢哋喺國際賽休戰期前作客以5比2大破熱拿亞，全場攻勢此起彼落，令觀眾睇到一場賞心悅目嘅比賽。馬里奧高美斯喺國際賽期間喺德國隊坐足兩場冷板櫈，谷埋一肚火要搵人發洩，整定作客嘅卡利亞里唔好彩。不過即使球隊成績同表現都好，教練蒙迪拿仍然為防線頭痛，佢哋今季喺意甲同歐霸場場失波，今場兩名主力二閘古達度同柏斯哥雙雙因傷缺陣，防線繼續唔穩陣。
卡利亞里反擊夠效率

卡利亞里唔係勁旅，但殺着係快速反擊威力強橫，失驚無神就打你一拳，令好多強隊都防不勝防，上仗佢作客頂唔住AC米蘭嘅超強火力好正常，但除咗由馬高沙奧入波外，仲製造咗唔少具威脅埋門機會，今場作客遇上主攻嘅勁敵，快速反擊又可以大派用場，既然兩軍今季聯賽至今全開大盤，今場入球大值得再追。