韋斯咸殘陣 益晒聖人

猪拉多纳

英超茅王唔識入波

為咗遷就周中嘅歐聯同歐霸盃，英超今晚得修咸頓主場對韋斯咸一場獨腳戲上演。最近韋斯咸勁運滯，安祖卡路爾復操後又重傷，搞到要急急簽被富咸放棄嘅柏歷頂檔，陣容更加立雜，成班球員來自唔同國家雞同鴨講，齋計士氣默契都輸死啦，不如撐修咸頓1.68倍主W好過！

（now621台周日晚11:00直播）

原本韋斯咸中鋒安祖卡路爾已經復操，點知佢隻玻璃腳無啦啦又傷過，最壞情況係要抖到出年5月，即係話今季就咁玩完。同時，「錘仔幫」除咗有中場祖高爾養緊傷，今季新加盟嘅翼鋒達寧都未克服傷患，換句話3件英格蘭國腳級球星都唔踢得，好似整定韋斯咸要用聯合國陣容救亡咁，弊在新簽嘅射手柏歷幾乎冇人要，以佢嘅狀態睇怕唔幫得幾多。
犯規次數最多 進攻最屎

仲有，賽前英國傳媒計過數，雖然艾拿戴斯以往9次領軍喺英超對修咸頓，有3勝6和未輸過，不過韋斯咸近15次作客聯賽得1勝4和10負，而且唔止係今季英超犯規次數最多球隊，仲係傳送次數最少（938次）同傳送成功率最低（72.3%），即係話踢人叻過踢波，佢哋喺國際賽前主場以0:1不敵史篤城，更羞家到1次中龍嘅埋門都冇！

對家修咸頓喺國際賽期前作客以0:1不敵諾域治，今季首次輸波，但射手列基林拔依然得到英格蘭國家隊信任，連續2場對摩爾多瓦同烏克蘭打正選，不過佢自己都明白，下個月朗尼同史杜列治好番，佢就未必有碇企，所以話要用入球說服英格蘭領隊鶴臣繼續用佢，呢場對住進攻數據勁差嘅韋斯咸，好可能係佢嘅最佳表現舞台！
乜都玩錦囊 捧埋修咸頓第一隊入球

「錘仔幫」韋斯咸喺英超作客成績差到痹，最近15場淨係贏過史篤城，點知上輪聯賽主場再鬥「腳下敗將」，唔單止被對手復仇成功，自己仲要1次中龍射門都冇。最大鑊係「錘仔」今季嘅傳波斷纜比率「冠絕」英超，今場捱打居多，捧修咸頓1.52倍「第一隊入球」啱數。
Data King 球賽編號：SUN（日）37

‧韋斯咸近15場聯賽作客錄得1勝4和10負劣績。

‧韋斯咸今季傳球成功率只得72.3%，係英超最差。

‧修咸頓近4次聯賽主場鬥「錘仔」未輸過，成績為2勝2和。