車仔冇霸氣細水長流

猪拉多纳

歐聯Ｅ組車路士主場迎戰瑞士巴素利，莫連奴食回頭草霸氣不再，車仔今季成績平平，攻力甚至弱過上季賓尼迪斯時期，令人失望。兩位前鋒費蘭度托利斯、伊度奧均屬過氣射手，往往靠中場後上埋門，威脅力難免打折扣。「寸王」一向目標為本，只求3分，毋須贏到盡，預料車仔今仗屬於小勝格，主Ｗ太熱冇肉食，寧博2.3倍入球細。

（有線64及203台周四凌晨2時45分直播）
伊度奧費托冇料到

莫連奴匆匆簽入伊度奧，但呢位32歲喀麥隆國腳巔峰已過，而且融入需時，恐怕短期內難有貢獻。至於費蘭度托利斯長期冇料到，更加無謂提。仲有一點係球隊上季進攻王桑馬達未受重用，中場組織力冇以往流暢。車仔上仗對愛華頓，有足球時間畀佢哋追都無法收復失地，可見欠缺一套有效進攻戰術。正因為火力有限，更加要小心提防失波，否則一旦落後難翻身，估計車仔唔會壓得太前。

巴素利上屆歐霸盃4強次回合作客車仔，一度取得領先，但卻於9分鐘內連失3球輸波，汲取教訓後，今趟再訪史丹福橋球場，會打醒十二分精神。而且車路士係呢組牌面最強，巴素利攞1分已經達標，一於屯重兵後防，專心打突擊。