巴塞「-2」阿積士抵捧

猪拉多纳

歐聯傳奇首度交鋒

舊敵人、新對手！西甲巴塞同荷甲阿積士雖然喺歐聯同樣4度奪標，但原來佢哋今晚喺H組嘅對決，竟然係歐戰史上首度交鋒。不過隨住効力過兩會嘅荷蘭球王告魯夫近排同巴塞會長羅素爾反面，兩會嘅牙齒印必有增無減，既然巴塞喺新帥馬天奴帶領下防線漏洞多多，話之佢哋有超強火力，讓2球力奇寧願博2.75倍「讓客」！

（有線62及202周四凌晨2:45直播）
法蘭叔「削權」專心領軍

其實計計數，歷來効力或者教過巴塞同阿積士嘅名將名帥多不勝數，除告魯夫外、諸如迪保亞兄弟、尹戈爾同列卡特等都係其中一分子，大家關係唔曳。只可惜做過巴塞榮譽會長嘅告魯夫，近排就同羅素爾反面，早前喺歐洲足協頒獎禮上，告魯夫更公開向對方追數，今場波呢位荷蘭球王亦話明唔會去魯營，就算巴塞賽前邀請佢出席高層飯局，佢都當耳邊風。

更令力奇決心撐阿積士，係賽前佢哋嘅人事變動，主帥法蘭迪保亞喺球會嘅技術發展組委員職務，已經畀足球總監奧華馬斯取代，「小飛俠」之後會同名將柏金及鍾克合作。雖則話法蘭叔表面睇好似被削減權力，但能夠專心領軍未嘗唔係好事。何況佢哋個進攻重心施安迪莊氣胸無礙今晚可復任正選，有佢拍住首席射手史基賀臣同前巴塞小將保贊攻堅，都唔係冇機會偷雞o架！
馬天奴丁父憂堅持帶隊

巴塞新帥馬天奴首度歐聯領軍，仲要剛啱喪父，賽後要趕返阿根廷奔喪，有冇貨交好難講。佢哋條防線近排對住華倫西亞同西維爾都各失2球表現麻麻。前日練波，馬天奴就同班波訓話40分鐘，希望鬧醒班人，衰在近排又有佐迪艾巴打柴，隊長佩奧爾剛啱傷愈復操但狀態未足，後衞線踢嚟踢去嗰幾個，唔攰就奇喇！

冇錯，巴塞有美斯加尼馬點會冇波入，但要留意佢哋上屆歐聯主場賽事，往往遇上對手決心死守好少炒得起。上屆分組賽主場只係小勝些路迪同莫斯科斯巴達1球，又和埋賓菲加，之後淘汰賽雖然數過AC四蛋，但8強同4強嘅主場戰都贏唔到，所以話今晚讓2球真係嫌多架！
魯營主場連勝斷纜

巴塞上屆主場曾連續21場不敗，但4強不敵拜仁斷纜。

巴塞主場6鬥荷蘭球隊錄得3勝3和。

阿積士近8次對西班牙球隊全部輸波。
阿積士死守半場細好路

雖則話巴塞火力強大，實力超班，但當所有對手都知你巴閉，去到魯營自然大打守勢波，阿積士又點會例外？估計上半場巴塞隨時會陷於苦戰，入1球都好頂盡，半場細有2倍值得一博o架！
歐聯H組