里昂爛船三斤釘貝迪斯「半和」睇定食

猪拉多纳

歐霸盃I組首輪即刻上演最強戲碼，貝迪斯喺主場恭候里昂。法國褪色班霸里昂雖則近況低迷，但話晒爛船都有三斤釘，睇怕貝迪斯喺自己地頭都唔敢操之過急，等摸清對手底細再調整戰略，吼實2.15倍「半場和」啱數。

（有線64及203周五凌晨3:05直播）
哥古夫傷愈復操未及披甲

昔日法甲班霸兼歐聯常客里昂光輝不再，早前喺歐聯附加賽鬥皇家蘇斯達唔夠踢之餘，更加拖垮聯賽成績，夾埋連輸4場入得1球，最終降格踢歐霸盃搞到士氣受挫，日前喺主場再悶和雷恩證明班波仲未反彈。進攻中場哥古夫與丹歷雖已傷愈復操，惟披甲機會唔大，組織攻勢大受影響，今場肯定穩陣行先。

至於貝迪斯經歷西甲開季3場不勝後，上輪主場清脆擊敗華倫西亞一洗頹風，兩名中前場核心魯賓卡斯度及祖安華度更有望復出搏殺，值得睇高一線。不過里昂話晒歐洲賽經驗豐富，正所謂小心駛得萬年船，相信貝迪斯教頭梅爾會謀定而後動，換邊後先見真章，捧半場和啱數。
歐霸盃I組